Nunanut allanut sillimaniarnermullu politikki
Naalakkersuisut naalagaaffinnik allanik nunarsuarmilu kattuffissuarnik isumaqatiginninniarnissaminnut isumaqatigiissusiornissamullu piginnaatitaapput. Suliassaqarfiit tamakkiisumik tiguneqarsimasut iluini Kalaallit Nunaanuinnaq attuumassutillit pineqartillugit. Suliassat nunanut allanut tunngasut Nunanut Allanut Pisortaqarfimmit Danmarkimilu Udenrigsministeria qanimut suleqatigineratigut isumagineqartarput.
Kalaallit Nunaanni aallartitaqarfiit
Nunat uku Kalaallit Nunaanni honorære konsulatinik imaluunniit generalkonsulatinik aallartitaqarput: Belgien, Canada, Frankrig, Holland, Island, Luxembourg, Norge, Storbritannien, Sverige aamma Tyskland, taakkuani aallartitat tamarmik Nuummiipput.
Island Tasiilami aallartitaqarpoq Letlandilu Qaqortumi aallartitaqarluni. 2013-imi ukiakkut Islandi generalkonsulatimik Nuummi aammaavoq. Italiap konsulatia 2012-imi Ilulissaniittoq atorunnaarpoq, kisianni aallartitatut allaffeqarfik suli atuuppoq.
Issittumi Siunnersuisoqatigiit
Issittumi Siunnersuisoqatigiit ukunannga ilaasortaaffigineqarpoq: USA, Canada, Rusland, Finland, Sverige, Norge, Island Danmark/Kalaallit Nunaat/Savalimmiullu. Siunnersuisoqatigiit sulinerannut nunat inoqqaavisa kattuffii arfinillit suleqataapput Permanent Participantsitut inissisimasut: Aluet International Association (AIA), Arctic Athabaskan Council (AAC), Gwichín Cuoncil International (GCI), Inuit Circumpolar Council (ICC), RAIPON aamma Saamit Siunnersuisoqatigiivi.
Isittumi Siunnersuisoqatigiit ilisimatusarnermik suliaat ataatsimiitsitalianut arfinilinnut immikkoortitigaapput, Kalaallit Nunaat ataatsimiitsitalianut taakkununnga amerlanernut sukumiisumik peqataavoq.
Issittumi Siunnersuisoqatigiit pillugu paasisassat annertunerusut uani atuarsinnaavatit: www.arctic-council.org
Nunat Avannarliit suleqatigiinnerat
Nunat avannarliit suleqatigiinnerat pisortatigoortumik Helfsingforsaftalen 1962-imeersumik tunngaveqarpoq. Isumaqatigiissut arlaleriarluni allanngortinneqartarsimavoq kingullermik 1996-imi. 1. januar 1984-imi Kalaallit Nunaat Savalimmiut Ålandilu peqatigalugit isumaqatigiissummut ilanngunneqarput. Danmark, Finland, Island, Norge aamma Sverigi Helsingforsaftalimi Nordisk Rådip Nodisk Ministerrådillu suleqatigiinnissamik inatsisaat allaqqapput.
Nordisk Råd
Kalaallit Nunaat Nordisk Rådimi marlunnik Inatsisartunit qinerneqarsimasunit ilaasortaatitaqarpoq, nunat inatsisartuisa suleqatigiiffigisaanni, Nordisk Ministerrådimut ukiumoortumik nalinginnaasumik katersuutereeraanngat Nordisk Ministerrådiamut aamma/imaluunniit nunanut avannarlernut tallimanut aamma/imaluunniit Kalaallit Nunaanut, Savalimmiunut Ålandimullu inassuteqaatinik (rekommandationinik) aalajangeriikkanik nassiussisarput.
Nunani Avannarlerni Ministerit Siunnersuisoqatigiivi
Nunani Avannarlerni Ministerit Siunnersuisoqarigiivi naalakkersuisut suleqatigiiffigivaat. Inuiaat akornanni paaseqatigiinnermik, isumaqatigiissuteqarneq tunngavigalugu sulinissamik Nunani Avannarlerni Ministerit Siunnersuisoqatigiivi tunngaveqarpoq naalagaaffiillu qullersaannit ingerlanneqarnani.Kalaallit nunaat isumaqatiginninniarnerni tamani siunnersuuteqarnissaminut peqataanissaminullu pissussaaffeqarpoq. Kalaallit Ministerit Siunnersuisoqatigiivini qinersisussaatitaanngilaq, kisianni Ministerit Siunnersuisoqatigiivisa aaliangiussaannut akuersisinnaavoq. Kalaallit Nunaata Nordisk Ministerrådimut peqataanera Namminersorlutik Oqartussanit nammineq akisussaaffigineqarpoq, Naalagaaffeqatigiinit nunanut allanut politikkianit pisussaaffiunani.
Nunani Avannarlerni Ministerit Siunnersuisoqatigiivi assigiinngitsunik ilaasortaqartarput apeqqutaasarluni suleqatigiinnermut apeqqutit suut suliarineqarnersut. Nunani Avannarlerni Ministerit Siunnersuisoqatigiivi siunnersuisoqatigiit ataasiinnaanngillat, kisiannili ministerit suliatigut siunnersuisoqatigiivi qulit, ataaserlu ministerit siunnersuisoqatigiit nalinginnaasunik suliaqartut, tassalu ministerit suleqatigiiffiat.
Nunani Avannarlerni Ministerit Siunnersuisoqatigiivimi nunat avannarliit suleqatigiinneranni statsministerit qullersaasutut akisussaasuupput, Nunani Avannarlerni Ministerit Siunnersuisoqatigiivinilu suleqatigiinnerup ataqatigiissarnissaa ministerit suleqatigiit akisussaaffigalugu.
Nunat tamat aamma Kalaallit Nunaat, Savalimmiut Ålandilu naalakkersuisumik toqqaasarput suleqatigiinnermut peqataasussamik.
Kalaallit Nunaannit Pinngortitamut, Avatangiisinut aamma Nunanut Avannarlernut suleqateqarnermut Naalakkersuisoq suleqatigiinnermut peqataavoq.
Killeqarfinni akornutit pillugit Siunnersuisoqatigiiffiat
Killeqarfinni akornutit pillugit Siunnersuisoqatigiiffiat Nordisk Ministerrådip ataani inissisimavoq. 1. januaari 2014-imi Kalaallit Nunaat Killeqarfinni akornutit pillugit Siunnersuisoqatigiiffiat ilannguppoq. Naalakkersuisut isumaqatigineqarput Greenland Business Killeqarfinni akornutit pillugit siunnersuisoqatigiiffiannut ilaasortaatigaqassasoq. Killeqarfinni akornutit pillugit Siunnersuisoqatigiiffianni Nunani Avannarlerni inuit aamma suliffeqarfiit saaffiginnissutaat, killeqarfinni akornutinut tunngasut suliarisarpaat. Killeqarfinnut akornutit makkununnga tunngasuusinnaapput; najuqarfiit, suliffiit imalluunniit Nunat Avannarliit akornanni niuerneq. Killeqarfiinni akornutit ikilinerisa kingunerissavaat Nunat Avannarliit suleqatigiinnerulernerat.
Nunani avannarlernik suleqateqarnerit aamma Nunani Avannarlerni Ministerit Siunnersuisoqatigiivi paasisaqarfiginerorusukkukkit una nittartagaq takuuk: www.norden.org
Kalaallit Nunaanni Nordens Institut (NAPA)
NAPA suliffeqarfiuvoq Nunani Avannarlerni Ministerit Siunnersuisoqatigiivinut atasoq, suliassaalu pingaarnerit pingasut tassaapput:
· Nunanut avannarlernut allanut kultureqarnikkut attaveqartarnerup ineriartortinneqarnissaa,
· kalaallini pissutsit pillugit nunanut avannarlernut paarlattuaniillu ilisimatitsisarnissaq, kiisalu
· kalaallit kulturikkut inuunerat meeqqanut inuusuttunullu suliassaqarfiit pingaartinnerullugit tapersersorneqartarnissaat pilerisaarneqartarnissaallu.
NAPA pillugu paasisaqarnerorusukkuit nittartagaq una takuuk: www.napa.gl
Nunat avannarliit killiit Siunnersuisoqatigiiffiat
Nunat avannarliit killiit Siunnersuisoqatigiivini inatsisartut suleqatigiittarnerat ingerlanneqartarpoq. Islandimi, Savalimmiuni aamma Kalaallit Nunaanni inatsisartut ilaasortassanik arfinilinnik qinersisarput. Siunnersuisoqatigiit namminneq allattoqarfeqarput, Islandip Altingianut atasuusoq. Kalaallit Nunaata suleqatiginnittarnera Inatsisartut Allattoqarfianniit isumagineqartarpoq.
Nunat avannarliit killiit Siunnersuisoqatigiiffiat pillugu uani paasisaqarnerusinnaavutit: www.vestnordisk.is
Inuuniarnikkut suliassaqarfik
Inuuniarnikkut Isumannaatsuunissaq pillugu Nunat avannarliit Isumaqatigiissutaat Kalaallit Nunaannit peqataaffigineqarpoq, tamatuma isumannaassavaa, nunani avannarlerni innuttaasut ilaqutariittut tapisiaqarsinnaanissaat, utoqqalinersiaqarsinnaanissaat kiisalu pisinnaatitaaffinnik allanik peqarnissaat kiisalu suliffissaaleqinermi pisassiissutinik pisinnaasarnissaat napparsimanermilu pisissiissutinik aamma taamaut pisarsinnaanissaat qulakkeerpaa.
Kalaallit Nunaat aamma Nunat Avannarliit Isumaqatigiissutaanut ilaavoq, tassani Isumaginninnermut Tunniuttakkat aamma Isumaginninnermut Ikiuutit pineqarput.
Kalaallit Nunaat FN-ip meeqqat pisinnaatitaaffii pillugit isumaqatigiissutaanut ilanngunnikuuvoq aamma FN-ip innarluutillit pillugit isumaqatigiissutaanut ilanngunnikuuvoq.
Europami suleqatigiinneq
Kalaallit Nunaata EU-mut isumaqatigiissutai uku pingaarnerupput:
· Kalaallit Nunaata EU-mit anineranut isumaqatigiissummut tapiliussaq, Kalaallit Nunaannut isumaqatigiissut.
· Kalaallit Nunaata EU-llu akornanni aalisarnermut isumaqatigiissut.
· Nunanut Oqartussaaffinnullu Imarpiup Illuatungaanniittut suleqatigiinnissamut aaqqissuussineq (OLT-mik isumaqatigiissut).
· Ilinniartitaanerup aallunneqarnerunissaa pillugu peqatigiilluni isumaqatigiissuteqarneq (2014-2020)
· Politikkikkut ataatsimoorussamik nalunaarummik nutarterineq
· Diamantit suli suliarineqarsimanngitsut nunanut allanut tunisassiarineri pillugit, EU-mi Kimberley atorlugu suleriaatsimut peqataaneq
· Uumasut nakorsaasa nakkutilliisarnerat pillugu isumaqatigiissut
· Aatsitassanut tunngatillugu Letter of Internt – aatsitassat pillugit siunniussaqarnermik nalunaarut
Aalisarneq pillugu suleqatigiilluni Isumaqatigiissut
Aalisarneq pillugu periarfissanik aalajangersagaq kiisalu tassunga atasumik protokoli tunngavigalugu nunarta karsia pisassanut taarsiullugu aningaasanik akiliinissamik pisussaatitaavoq. Alisarneq pillugu suleqatigiilluni Isumaqatigiissutip Kalaallit Nunaata EU-llu akornanni suleqatigiinnissaq siunertaraa. Kalaallit Nunaat EU-mut aalisakkanik pisassiisippat EU naatsorsuutinut akiliisaaq. Isumaqatigiissuut ukiut arfinillit atuuttussaavoq protokoli ukiut pingasut atuuppoq. EU-p Namminersorlutillu Oqartussat akunnerminni aalisarneq pillugu suleqatigiinnissamik isumaqatigiissummi aalajangersakkat pillugit isumaqatigiissutigaat. Protokoli tunngavigalugu ukiumut pisassiissutit aamma aalisarnermut politikkit iluarsaanneqartarput.
Nunap imartaa imaanilu pisinnaatitaaffiit
Kalaallit Nunaanni imartaq 3 sømilinik annertussuseqarpoq. Taassuma saniatigut aningaasaqarnermut tunngasut Kalaallit Nunaata nammineq pigisai 200 sømilit tikillugit killiffeqarput, killeqarfiit aalisarnermut aatsitassanut uulianut gassinullu immikkut pisinnaatitaaffinnik tunisipput. Killeqarfiit taakku nunanut allanut aveqatigiiffiugaangat isumaqatigiissusiortoqartarsimavoq qiterpiaagut killeqarfiliisarneq tunngavigalugu. Tamanna Norgep eqqaani Jan Mayenimi Svalbardimiluu kiisalu Islandimut Canadamullu attaveqartarnermut atuuppoq.
Kalaallit Nunaata Canadallu 1974-imi nunap pissusiitigut (geologiskimik) nunavissuit sinerissap qanittuaniittumi killilernerinut tunngasumik iluarsiinissaq Canadamit kinguarsarneqarpoq. Tassani pineqarluni qeqertaq Tartupaluk Naalagaaffeqatigiit Canadallu tamarmik perusutaat.
Imaani pisinnaatitaaffiit pillugit FN-ip isumaqatigiissutaa Inatsisartut isumaqatigiissutigereerpaat (UNCLOS). Imaani pisinnaatitaaffiit pillugit isumaqatigiissummi immikkoortoq 76 naapertorlugu avammut 200 sømil qaangerlugit immap naqqata nunavimmut atasortaata piumasaqaatiginiarlugu uppernarsaasiinissaq pillugu misissuinermut Namminersorlutik Oqartussat naalagaaffimmi oqartussat aamma Savalimmiut suleqatigalugit suliaqarput. Tassani pineqarlutik Kalaallit Nunaata avannaata avannarpasinnerusuaniittut, avannaata kangiata kangerpasinnerusuaniittut kujataatalu kujasinnerusortaaniittut pineqarput.
Imaani pisinnaatitaaffiit pillugit isumaqatigiissutip atsiorneqarnerata kingorna kingusinnerpaamik ukiut qulit kingorna taamatut piumasaqarneq ilisimatusarnikkut uppernarsarneqarsimasussaavoq, tassa Kalaallit Nunaat eqqarsaatigalugu kingusinnerpaamik 2014-imi.
Naalagaaffeqatigiiffik 2012-imi junimi nunaviup toqqavia pillugu Kalaallit Nunaata kujataata kujataaniittup killilerneranut aamma 2013-imi Kalaallit Nunaata kangiata avannaata nunaviup toqqavia pillugu FN-imut piumasaqaateqarpoq. Kalaallit Nunaata kangiata avannaanut tunngasoq naatsorsuutigineqarpoq 2014-ip naanerani suliaralugu naammassineqassasoq. Nunap toqqavii Kalaallit Nunaanut nunanullu allanut ataatsikkut atappata, tamanna aaqqiviginiarneqassaaq illuatungeriilluni isumaqatiginninniarnikkut.
Imaani pisinnaatitaaffiit pillugit FN-ip isumaqatigiissutaa aamma nunaviup toqqavia atasortaa pillugu ataatsimiitsitaliarsuaq uani atuarsinnaavatit: www.un.org aamma www.a76.dk
Nunat tamalaat isumaqatigiissutaat
Kalaallit Nunaata aalisarneq pillugu EU-mut isumaqatigiissutaata (immikkoortoq Europami suleqatigiinneq takuuk) saniatigut aalisarneq pillugu Norgemut, Ruslandimut Savalimmiunut Islandimullu isumaqatigiissuteqarpoq.
Aalisarneq piniarnerlu pillugit nunani tamalaani suleqatigiinnerit
Kalaallit Nunaat aalisarneq piniarnerlu pillugit nunat tamalaat suleqatigiiffiini ukunani peqataavoq:
· NAFO (Atlantikup avannaani kitaani aalisarneq pillugu suleqatigiiffik)
· NEAFC (Atlantikup avannaani kangiani aalisarneq pillugu suleqatigiiffik)
· NASCO (Atlantikup avannaani Kapisillit pillugit suleqatigiiffik)
· IWC (Nunat tamalaat Arfanniartarneq pillugu ataatsimiititaliarsuat)
· NAMMCO (Atlantikup avannaani Miluumasut imarmiut pillugit suleqatigiiffik)
· JCNB (Canadamiut/Kalaallillu Qilalukkat qaqortat qernertallu pillugit ataatsimut ataatsimiititaliaat)
· CITES (Convention for the International Trade of Endangered Species)
· IUCN (International Union for the Conservation of Nature)
· PBSG (Polar Bear Specialist Group)
· PBRS (Polar Bear Range States)- WITS (Walrus International Technical Specialists)
· CBird (Circumpolar Seabird Expert Group)
· CARMA (CircumArctic Rangifer Monitoring and Assessment Network)
Soqutigisaqaqatigiit ataasiakkaat nittartakkami uani takukkit: www.naalakkersuisut.gl
Nunat marluk paarlaateqatigiillutik suleqatigiinneri allat
Kalaallit Nunaat nunat uku Island, Canada (Nunap immikkoortortai Northwest ATerritories, Québec aamma Nunavut tassunga ilaapput) aamma Korea Kujalleq paarlaateqatigisarlugit suleqatigivai.
Suleqatigiinnermut siunertaasut pingaarnersarivaat ilinniartitaaneq, inuussutissarsiutit siuarsarnerat, pisussussutinik atuineq aamma piujuartussanik ineriartortitsineq pillugit suleqatigiilernissaq.
OLT pillugu isumaqatigiissut
OLT-imut ilaasortaapput nunat sisamant EU-mut ilaasortat qeqertanut naalakkersuinikkut attuumassuteqartut. Nunat OLT-imut ilaasortat ukuupput; Storbritannia, Holland, Frankrig aamma Danmark. Den Europæiske Udviklingsfondimit OLT aningaasaliiffigineqartarpoq. OLT EU Kommissioniata naalakkersuisoqarfianit allaffissornikkut ingerlanneqarpoq, tamanna pissutaalluni nunat OLT-imut ilaasortat Kommissionilu imminnut qanillutik suleqatigiipput.
Kalaallit Nunaat nunanut ineriartortunut ikiorsiissutinik Europæisk udviklingsfondimit pissarsiaqarneq ajorpoq. Tamaakkaluartorli Kalaallit Nunaata OLT aqqutigalugu iluaqutissat assigiinngitsut assersuutigalugu makku pissarsivigisarpai; akileraaruteqarnani EU-mi niuerfissuarni aalisakkanik nioqquteqarneq, nunanit allaneersunit kinguppannik qaleralinnillu tuniseqqissinnaaneq, inunnik pingaarutilinnik ilisimasaqalernissamut periarfissat, tassani eqqarsaatigineqarnerullutik ataatsimeersuarnernut, isumasioqatigiinnernut workshopertoqarneranilu peqataasinnaanerit, ajunaarnersuaqartillugu ikiorneqarsinnaaneq EU-milu suliniutinut assigiinngitsorpassuarnut ilanngussinnaaneq.
Piffissami 2014-imiit 2020-mut OLT pillugu isumaqatigiissut malillugu European Investment Bank (EIB) € 100.000.000 OLT-imut aningaasaliissuteqarsimavoq. Tamatuma kingueranik, Kalaallit Nunaat aningaasaqarnerup aamma suliffissuaqarnerup ineriartortinnissaanut, EIB-imut aningaasanik atorniarsinnaavoq. Attaveqatigiinnermut tunngasut, nukissiuuteqarnermut tunngasut avatangiisinullu tunngasut EIB-imit aningaasanik taperneqartarput, aningaasaliissutit ajunaarutaasinnaasut. Aningaasaliisutit amerlanerpaartaat namminersortunut tapiissutaasarput.
Kalaallit Nunaat Association af Oversøiske Lande og Territorier-mut (OCTA) siulittaasunut ilaasortaatitaqarpoq 2012-imilu OLT pillugu isumaqatigiissummut siulittaasuulluni.
OLT pillugu paasissutissat annertunerusut nittartakkami uani pineqarsinnaapput: www.octassociation.org
Suleqatigiinnissaq pillugu isumaqatigiissut
Kalaallit Nunaata Danmarkilu suleqatigiinnissamik isumaqatigiissuteqartut aammattaaq Kalaallit Nunaat EU-lu suleqatigiinnissamik isumaqatigiissuteqarput. Piffissami 2014-imiit 2020-mut ilinniartitaanerup pingaartinneqartussatut suliniutigineqarnissaa Naalakkersuisut salliutippaat, isumaqatigiissummili isummiunneqarpoq, suliassaqarfiit allat ilanngunneqarsinnaasut (assersuutigalugu aatsitassat ikummatissallu, avatangiisit aamma takornariaqarneq), illuatungeriinit isumaqataaffigineqarpat. Isumaqatigiissutip piviusunngortinnissaa aalajangersimasunik angusassalinnik kiisalu angusimasat nalilersornissaanut pilersaarutiliornikkut.
Nunarsuaq tamakkerlugu suleqatigiinneq, FN
Kalaallit Nunaat FN-mi suleqatigiiffinnut arlalinnut ingerlaavartumik assersuutigalugu Inuit Pisinnaatitaaffii pillugit FN-ip siunnersuisoqatigiivinut (HRC) aamma Nunat Inoqqaavisa Pisinnaatitaaffii pillugit Immikkut ilisimasalittut suleqatigiissitamut (EMRIP).
Kalaallit nunaat Nunat Inoqqaavisa Oqaasissaqarfiinut tunngatillugu Naalagaaffiit Peqatgiit Oqallittarfiannut (UNPFII-mut) peqataasarpoq. Taamatuttaaq Kalaallit Nunaat nunat inoqqaavinut tunngasut ataavartumik Ataatsimiittartoqatigiivini peqataasarpoq, FN-ip aningaasaqarnermut inuuniarnermullu Siunnersuisoqatigiivini (ECOSOC) ilaatigut kalaallit danskillu 2002-mi iliuuseqarnerisigut pilersinneqartunut.
Nunarsuaq tamakkerlugu suleqatigiinneq pillugu paasissutissat annertunerusut nittartakkami uani takukkit: www.ohchr.org
Nunarsuaq tamakkerlugu suleqatigiinneq, WTO
28. novembari 1994 Naalakkersuisut aaliangerput Kalaallit Nunaata 1995-imi atuutilertussamut Nunarsuarmi suleqatigiiffimmut (WTO) Naalagaaffeqatigiit ilanngunnerat malinniarlugu. Nunanut allanut niuernermi atugassarititaasut pitsaanerpaat anguniarneri ilanngunniarnermut siunertarineqarpoq. Naalakkersuisut 9. decembari 2005-imi aaliangerput inatsisit WTO-mi maleruagassat malillugit ilusilerneqassasut. Piffissami matumani Naalakkersuisut WTO-mut nalunaaruteqartalerniarlutik Doha-rundip naammassinissaa utaqqivaat..
WTO pillugu paasissutissat annertunerusut nittartakkami uani takuneqarsinnaapput: www.wto.org
Illersornissaq isumannaallisaanerlu
Amerikarmiut Kalaallit Nunaanni sakkutooqarfeqarnerat pillugu isumaqatigiissut pillugu isumaqatigiissuteqarnikkut toqqammaviusoq tassaavoq Illersornissaq pillugu Isumaqatigiissut 27. april 1951-imeersoq.
Illersornissaq pillugu isumaqatigiissut pillugu kingullermik isumaqatigiinniarnerit 2004-mi Igalikumi isumaqatigiissuteqarnikkut naammassineqarput, tamatumunngalu ilaapput teknikikkut aningaasaqarnikkullu suleqatigiinnissaq Join Komitémik taasaq kiisalu avatangiisit pillugit isumaqatigiissut. Nammersorlutik Oqartussat aamma forsvarsminiteriet qanimut Issittumi suliassat pillugit suleqatigiipput, 2015-imi suliassanik pilersaarusiorneq naammassineqassasoq naatsorsuutigineqarpoq.
Northern Periphery Programme
Northern Periphery Programme (NPP) EU-mit suliniutaavoq piffinni ineriartortitsinerni aningaasaateqarfiulluni. NPP-ip inuussutissarsiutit avinngarusimasuni ineriartortinneqarnissaat siunertaraa. Kalaallit Nunaat 2000-imili NPP-mut ilannguppoq.
2014-mi programmi nutarsarneqartussaavoq. Programmi nutaaq Northen Periphery and Arctic-mik taaguuteqartinneqassaaq (NPA). 2014-mit 2020-mut programmi atuutsinneqarumaarpoq.
Northern Periphery Programme annertunerusumik paasisaqarusukkuit una anittartagaq alakkarsinnaavat: www.northernperiphery.eu
Nittartakkat takuneqarsinnaasut
Naalakkersuisut siulittaasuata Naalakkersuisoqarfia, Nunanut allanut ingerlatsineq pillugu Nassuiaat, Nunani allani sinniisuutitaqarneq, Europamiut suleqatigiinnissaannut tunngasut, Kalaallit Nunaata Bruxellesimi Sinniisuutitaqarfia, Aalisarneq pillugu isumaqatigiissut, OLT-mik suleqatigiinnissamut isumaqatigiissutit, Peqatigiinnissamut isumaqatigiissut, Canadamik suleqateqarneq, Illersornissaq isumannaallisaanerlu nittartakkami uani takuuk: www.naalakkersuisut.gl
Imaani pisinnaatitaaffiit pillugit FN-ip isumaqatigiissutaa nittartakkami uani takuuk: www.un.org